కోరలు చాస్తున్న కరోనా వైరస్‌ సెకండ్‌ వేవ్... అవగాహన లేకుంటే పెనుప్రమడమే

దేశవ్యాప్తంగా కరోనా వైరస్‌ సెకండ్‌ వేవ్‌ కోరలు చాస్తోంది. అన్ని రాష్ట్రాల్లోనూ కొవిడ్ కేసులు ఊహించని రీతిలో పెరిగిపోతున్నాయి. రెండు నెలల క్రితం వరకూ కరోనా వైరస్ తాకిడి తగ్గిందని ఊపిరి పీల్చుకొనేలోపే మ్యుటేషన్ చెందిన వైరస్ తీవ్రంగా దాడి చేస్తోంది. తొలి దశలో వచ్చిన కరోనా వైరస్ కుటుంబంలో ఒకరికి సోకితే జాగ్రత్తలు తీసుకున్న మిగతా వారికి వచ్చే అవకాశం కాస్త తక్కువగా ఉండేది. కానీ, ఈ కొత్త స్ట్రెయిన్ మాత్రం కుటుంబంలో ఒకరికి వస్తే అందరికీ సంక్రమించే అవకాశాలు మెండుగా ఉన్నాయని తెలంగాణ ఆరోగ్యశాఖ డైరెక్టర్ శ్రీనివాసరావు వెల్లడించారు. అంతేకాక, ప్రస్తుతం కరోనా సోకిన వారిలో పరిస్థితి సీరియస్‌గా అవుతున్నవారి సంఖ్య ఎక్కువగా ఉంటోంది. ఇంకా మరణాలు కూడా అధికంగానే నమోదవుతుండడం కలవరపరుస్తోంది. ఈ క్రమంలో వైద్య నిపుణులు రెండో దశ కరోనా గురించి వెల్లడించిన కీలక వివరాలు మీలో అవగాహన కల్పించడం కోసం అందిస్తున్నాం.

వ్యాక్సిన్ కచ్చితంగా అవసరమే..
ప్రస్తుతం కరోనా నుంచి రక్షణ కల్పించేందుకు మనకు అందుబాటులో ఉన్న వ్యాక్సిన్స్‌లు రెండు డోస్‌లు వేసుకున్న వారిలో కూడా వైరస్ సంక్రమించిన కేసులు వెలుగులోకి వచ్చాయి. అయితే, వ్యాక్సిన్ వేసుకుంటే పరిస్థితి సీరియస్ అయ్యే బాధ తప్పుతుందని, తక్కువ లక్షణాలతో ఆస్పత్రికి వెళ్లకుండానే నయం చేసుకొనే అవకాశం ఎక్కువగా ఉంటుందని నిపుణులు చెబుతున్నారు.

రెమిడిసివిర్ ఇంజెక్షన్ పాత్ర ఎంత?
ఈ ఇంజెక్షన్ అనేది కరోనా సంక్రమించి సీరియస్‌గా ఉన్న వారిలో చనిపోవడాన్ని మాత్రం ఆపబోదని పరిశోధనల్లో తేలింది. అయితే, ఇది తక్కువ లక్షణాలు లేదా మరీ సీరియస్‌గా ఉన్న సందర్భాల్లో ఇవ్వకూడదని పలువురు అభిప్రాయపడుతున్నారు. కేవలం మాధ్యమిక కరోనా లక్షణాలు ఉన్నవారికి ఈ రెమిడిసివిర్ ఇంజెక్షన్ నిర్ణీత మోతాదులో ఇస్తే ఫలితం ఉంటుందని వైద్యులు చెబుతున్నారు.

మూడు మ్యుటేషన్లు
కరోనా వైరస్ అనేది RNA వైరస్. ఇందులో వైరస్ మ్యుటేషన్లు చెందడం అనేది సహజం. ఇప్పటికే కరోనా ఎన్నో మ్యుటేషన్స్ చెందినా ప్రధానంగా బ్రెజీలియన్ స్ట్రెయిన్, సౌతాఫ్రికన్ స్ట్రెయిన్, ఇండియాలో వచ్చిన డబుల్ మ్యూటేంట్ స్ట్రెయిన్ ఎక్కువగా ప్రభావం ఉందని నిపుణులు చెప్పారు. ఈ క్రమంలో ప్రస్తుతం ఈ వేవ్ చాలా ప్రమాదకరమని చెబుతున్నారు. గత వేవ్‌లో కేవలం దగ్గు, జలుబు, ఊపిరి సమస్య, వాసన తెలియకపోవడం వంటి సమస్యలు ఉంటే.. ఈ రెండో వేవ్‌లో మాత్రం వీటితో పాటు, ఒళ్లు నొప్పులు, ఎక్కువ మందిలో శ్వాస సమస్యలు, కొంత మందిలో విరేచనాలు కూడా అవుతున్నట్లు వైద్యులు తెలిపారు.

మరికొన్ని వివరాలు..
కరోనా పరీక్షలు ఎప్పుడు చేసుకోవాలి?
లక్షణాలు ఉన్నప్పుడే కరోనా పరీక్షలు చేయించుకోవడానికి వెళ్లాలి. పాజిటివ్‌ రోగితో అత్యంత సమీపంలో ఉండటం, ఆరడుగుల దూరంలో కూడా కనీసం 15 నిమిషాలు కలసి ఉన్నా వైరస్ సంక్రమించే అవకాశం ఉంది.

ఇప్పటివరకు ఉన్న లక్షణాలు: జ్వరం, ఒళ్లు నొప్పులు, వాసన లేక రుచి లేకపోవడం, చలి ఉండటం, ఊపిరి తీసుకోవడంలో ఇబ్బంది. 

కొత్త లక్షణాలు: పాత లక్షణాలతోపాటు.. కళ్లు గులాబీ లేదా ఎరుపు రంగులోకి మారడం, విరేచనాలు లేదా డయేరియా, తాత్కాలిక వినికిడి శక్తి లోపం, గొంతులో నుస వంటివి..

ఏ పరీక్ష చేయించుకోవాలి?
వైరస్ సంక్రమించిందా లేదా అనేందుకు ఆర్‌టీపీసీఆర్‌ కీలకమైన నిర్ధారణ పరీక్ష. ర్యాపిడ్‌ యాంటీజెన్‌ అప్పటికప్పుడు నిర్ధారణ చేసుకునే పరీక్ష. ర్యాపిడ్‌ టెస్టులో పాజిటివ్‌ ఉంటే కరోనా నూటికి నూరు శాతం నిర్ధారణ అయినట్లే. మళ్లీ ఆర్‌టీపీసీఆర్‌ టెస్ట్‌ చేయించుకోవాల్సిన అవసరం లేదు. ర్యాపిడ్‌లో నెగెటివ్‌ వచ్చి
లక్షణాలుంటే, ఆర్‌టీపీసీఆర్‌ పరీక్ష చేయాల్సి ఉంటుంది.

మందులు, చికిత్స విధానాలు..
పావిపిరావిర్‌ మాత్ర అత్యవసర వాడకానికి మాత్రమే దీనికి అనుమతి ఉంది. పైగా ట్రయల్స్‌ జరుగుతున్నాయి. దీనికి మరణాలను ఆపగలిగే శక్తిలేదు.
ఎప్పుడు వాడాలి..
* జ్వరం, దగ్గు, ఆయాసం ఉన్నప్పుడు
* 18-75 ఏళ్ల మధ్య వారికి మాత్రమే వాడాలి
* ఈ మాత్ర వాడకంపై జాతీయ స్థాయిలో ఎలాంటి సిఫార్సులు లేవు. కానీ డాక్టర్ల సూచనల మేరకు 72 గంటల్లోగా ఇస్తే వైరల్‌ లోడ్‌ తగ్గిస్తుంది.

కరోనా దశలు..
మొదటి దశ: హోం క్వారంటైన్‌ లేదా ఐసోలేషన్‌ వార్డు
* లక్షణాలు లేకుండా కరోనా బారినపడినవారు.
* కొద్దిగా జ్వరం, బలహీనంగా ఉండటం, కండరాల నొప్పి, దగ్గు, గొంతు నొప్పి, ముక్కు కారడం, తుమ్ములు, వాంతులు, వాంతులు వస్తున్నట్లుగా అనిపించడం, కడుపునొప్పి, విరేచనాలు

రెండో దశ: ఆసుపత్రిలో సాధారణ లేదా ఆక్సిజన్‌పై చికిత్స
* జ్వరం తగ్గకపోవడం, దగ్గు నిరంతరాయంగా ఉండటం, ఛాతీ ఎక్స్‌రే లేదా సీటీ స్కాన్‌లో ఏదో సమస్యను గుర్తించడం

మూడో దశ: ఐసీయూ
* తీవ్రమైన ఊపిరితిత్తుల సమస్య ఉంటుంది. రక్తంలో ఆక్సిజన్‌ శాతం 92 కంటే తక్కువగా ఉంటుంది. అప్పుడు కచ్చితంగా ఆక్సీజన్ అందించాలి.
* అత్యవసర క్రిటికల్‌ కేర్, అక్యూట్‌ రెస్పిరేటరీ డిస్ట్రెస్‌ సిండ్రోమ్, లో బీపీ, గుండె వైఫల్యం, రక్తనాళాల్లో రక్తం గడ్డకట్టడం, కిడ్నీ సమస్యలు తలెత్తడం వంటి సమస్యలు వచ్చే అవకావాలు మెండు.

ప్లాస్మా చికిత్స..
ఇది అత్యవసర వాడకానికి మాత్రమే అనుమతి ఉంది. ఇది కూడా ట్రయల్‌ దశలో ఉంది. ప్రత్యామ్నాయంగా మాత్రమే వాడేందుకు అనుమతి ఉంది. 18 ఏళ్లు పైబడిన వారికే చేయాల్సి ఉంటుంది. జ్వరం, దగ్గు, శ్వాస తీసుకోవడంలో ఇబ్బంది, శ్వాస తీసుకునే స్థితి నిమిషానికి 35 ఉన్నప్పుడు లేదా రక్తంలో ఆక్సిజన్‌ శాతం 90 కంటే తక్కువ ఉన్నప్పుడు చేస్తారు. ప్లాస్మా చికిత్స వల్ల కరోనా నుంచి కోలుకునే అవకాశం ఉంది. దీన్ని వాడాలా వద్దా డాక్టర్‌ నిర్ణయంపై ఆధారపడి ఉంటుంది.

నివారణే అసలైన మార్గం..
ఇప్పుడు కోవిడ్‌ సోకితే చేస్తున్న చికిత్స విధానాలన్నీ ట్రయల్స్‌కు సంబంధించినవే. కోవిడ్‌కు పక్కాగా ఎలాంటి మందూ లేదు. దీన్ని సోకకుండా జాగ్రత్త పడడం ఒకటే మార్గం.

సమయం తెలుగు న్యూస్ సౌజన్యంతో....

కొత్త లక్షణాలు: పాత లక్షణాలతోపాటు.. కళ్లు గులాబీ లేదా ఎరుపు రంగులోకి మారడం, విరేచనాలు లేదా డయేరియా, తాత్కాలిక వినికిడి శక్తి లోపం, గొంతులో నుస వంటివి..