ఏపీలో దేవాలయాలకు జియో ట్యాగింగ్ ... డిజిపి గౌతమ్ సవాంగ్

 

అమరావతి: రాష్ట్రంలోని  దేవాలయాలకు  జియో ట్యాగింగ్‌, సీసీ కెమెరాలు ఏర్పాటు చేస్తామని  డీజీపీ సవాంగ్ ప్రకటించారు.  ఆంధ్రప్రదేశ్‌లో వరుసగా దేవాలయాల విధ్వంసం కొనసాగుతుండటంతో పోలీసు శాఖ అప్రమత్తమయ్యింది. ఇందులో భాగంగా దేవాలయాలు, ప్రార్థనా మందిరాల దగ్గర నిరంతర నిఘా కొనసాగుతుందని డీజీపీ సవాంగ్ ప్రకటించారు. పోలీసుశాఖతోపాటు అన్ని శాఖలు  అప్రమత్తంగా ఉన్నాయని చెప్పారు. అనుమానాస్పద వ్యక్తుల కదలికలపై డయల్‌ 100కు సమాచారం ఇవ్వాలని కోరారు. భద్రతా చర్యలను పర్యవేక్షించాలని జిల్లాల ఎస్పీలను ఆదేశించారు.

విజయనగరం జిల్లాలోని రామతీర్థంలో 400 ఏండ్ల నాటి శ్రీరాముడి విగ్రహాన్ని గత నెల 28న (సోమవారం) దుండగులు ధ్వంసం చేశారు. తల భాగాన్ని వేరుచేసి ఎత్తుకెళ్లారు. విషయాన్ని గుర్తించిన అర్చకులు పోలీసులకు ఫిర్యాదు చేశారు. ఈ ఘటనతో ఏపీ రాజకీయాలకు రామతీర్థం కేంద్ర బిందువుగా మారింది. శనివారం  ప్రతిపక్ష నేత చంద్రబాబు నాయుడు ఘటనా స్థలాన్ని పరిశీలించారు.  ఇదంతా  టీడీపీ కార్యకర్తల పనేని, తమ ప్రభుత్వాన్ని అప్రదిష్టపాలు చేయడానికే పచ్చపార్టీ ఇలాంటి ఘటనలకు పాల్పడుతున్నదని వైసీపీ ఎంపీ విజయసాయి రెడ్డి ఆరోపించారు.