భారత్ లో 50 లక్షలు దాటిన కరోనా కేసులు…

24గంటల్లో 90వేల కేసులు, 1290 మంది మృతి

న్యూడిల్లీ (జనహృదయం):  దేశంలో కరోనా వైరస్ వ్యాప్తి కొనసాగుతోంది.  దేశవ్యాప్తంగా 11,16,842 కొవిడ్‌ నిర్ధారణ పరీక్షలు చేయగా వీటిలో 90,122 పాజిటివ్‌ కేసులు వెలుగుచూశాయి. దీంతో బుధవారం నాటికి దేశంలో కరోనా కేసుల సంఖ్య 50,20,359కు చేరినట్లు కేంద్ర ఆరోగ్య, కుటుంబ సంక్షేమశాఖ ప్రకటించింది.     ఇప్పటికే 39లక్షల మంది కోలుకోగా మరో 9లక్షల 95వేల యాక్టివ్ కేసులు ఉన్నట్లు పేర్కొంది.

మంగళవారం ఒక్కరోజే అత్యధికంగా 82వేల మంది ఈ వ్యాధి నుండి కోలుకున్నారు.   ఒక్కరోజులో 1290 మంది కరోనా రోగులు ప్రాణాలు కోల్పోయారు. 24గంటల వ్యవధిలో ఇన్ని మరణాలు సంభవించడం ఇదే తొలిసారి. కాగా, రోజువారీ మరణాలు 1200దాటడం ఇది మూడోసారి. దీంతో దేశంలో ఇప్పటివరకు కరోనా సోకి మృతిచెందిన వారిసంఖ్య 82,066కి చేరింది.  దేశంలో కరోనా మరణాల సంఖ్య కాస్త ఆందోళన కలిగిస్తోంది.

అయితే, కొవిడ్‌-19తో మరణిస్తున్న వారిలో దాదాపు 70శాతానికి పైగా ఇతర ఆరోగ్య సమస్యలు ఉన్నవారేనని కేంద్ర ఆరోగ్యశాఖ స్పష్టంచేస్తోంది. ప్రస్తుతం దేశంలో కరోనా బాధితుల రికవరీ రేటు 78.5శాతానికి చేరడం ఊరట కలిగించే విషయం.   అయితే, మరణాల రేటు మాత్రం 1.63శాతంగా ఉన్నట్లు కేంద్ర ఆరోగ్యశాఖ పేర్కొంది. ఇక దేశవ్యాప్తంగా ఇప్పటివరకు 5కోట్ల 94లక్షల శాంపిళ్లకు కొవిడ్‌ టెస్టులు పూర్తిచేసినట్లు భారత వైద్య పరిశోధన మండలి(ఐసీఎంఆర్‌) వెల్లడించింది.